اسلام آباد میں پی ٹی آئی رہنماؤں اور کارکنوں کیخلاف درج مقدمات سی ٹی ڈی منتقل

عمران خان کی ممکنہ گرفتاری کے خلاف احتجاج پر پی ٹی آئی رہنماؤں اور کارکنوں کیخلاف درج مقدمات انسداد دہشتگردی اور اسپیشل انویسٹی گیشن یونٹ منتقل کردئیے گئے۔

پاکستان تحریک انصاف کے چیئرمین عمران خان کی ممکنہ گرفتاری پر وفاقی دارالحکومت سمیت دیگر شہروں میں پی ٹی آئی رہنماؤں اور کارکنوں نے احتجاج کیا تھا، اس دوران پرتشدد واقعات بھی دیکھنے میں آئے تھے۔

اسلام آباد کے مختلف تھانوں میں پی ٹی آئی رہنماؤں اور کارکنوں کیخلاف کئی مقدمات درج کئے گئے، دہشتگردی کے مقدمات کی تفتیش سی ٹی ڈی اور توڑ پھوڑ کی تحقیقات انویسٹی گیشن یونٹ کرے گا۔

تھانہ کھنہ میں درج انسداد دہشتگردی مقدمے سی ٹی ڈی منتقل کردئیے گئے جبکہ ترنول اور بہارہ کہو کے مقدمات تفتیش کیلئے اسپیشل انویسٹی گیشن یونٹ منتقل کئے گئے ہیں۔

مزید پڑھیے : زمان پارک آپریشن روکنے کے حکم میں توسیع، پی ٹی آئی کو جلسہ نہ کرنے کی ہدایت

رپورٹ کے مطابق ایس ایس پی انویسٹی گیشن کے کیس تجربہ کار تفتیشی افسران کو منتقلی کے احکامات جاری کئے گئے ہیں، ایس پی لیول کا افسر تفتیش مانیٹر کرے گا اور حتمی رپورٹ ایس ایس پی انویسٹی گیشن کو دی جائے گی۔

انتظامیہ نے فیصلہ کیا ہے کہ مظاہرین کے پتھراؤ سے زخمی پولیس اہلکاروں کے مقدمہ کی رپورٹ روزانہ دی جائے گی، مقدمات تھانوں پر کام کا بوجھ کم کرنے اور تفتیش درست انداز میں کرنے کیلئے منتقل کئے گئے ہیں۔

from Samaa - Latest News https://ift.tt/smXojgy